Arabako Foru Aldundiak sektoreari eragiten dioten neurrien berri eman dio UAGAri aste honetan, zerga berrikuspenerako foru araua onartu berritan. Neurri nagusia forfaita PFEZn finkatzea da eta horrek esan nahi du nekazaritza, abeltzaintza eta ardogintzako jardueretan justifikazio zaileko gastuak % 70ean mantenduko direla.

Jarraibide hori, gainera, hiru euskal aldundien artean adostu da, lurralde guztietan berdina izan dadin.

Forfaitaren egungo ehunekora handitzea foru gobernuak 2022an bultzatu zituen salbuespenezko neurriekin ezarri zen, Errusia eta Ukrainaren gatazkatik sortutako krisiaren ondorioz. “Aldi baterako hartu zen neurri bati izaera egonkorra eman diogu. Horrek zerga tratamendu mesedegarriagoa dakar, ziurgabetasun-egoeretarako arrisku handiagoa duen sektore ekonomiko bat garatzeko behar den segurtasun juridikoa ematen baitu “, adierazi du Itziar Gonzalo Ogasun diputatuak.