Gizarte Segurantzak laster erregularizatuko ditu 2023. urteari dagozkion kotizazio-oinarriak eta horren emaitza jakinaraziko die autonomoei. Jakinarazpen hori Gizarte Segurantzaren Egoitza Elektronikoaren bidez bakarrik egingo du.

Horretarako, autonomo guztiei gogorarazten zaie Gizarte Segurantzaren Egoitza Elektronikoan jakinarazpen hori eskuratu ahal izateko beharrezkoa dela ziurtagiri digital bat izatea (Izenpe, gako iraunkorra, Diruaren eta Zerga-zigiluaren Fabrika Nazionalaren ziurtagiria) edo NAN elektroniko bat.

Era berean, mugikorraren zenbakia eta helbide elektronikoa jakinarazi beharko dizkiote Gizarte Segurantzari jakinarazpen bat dutela jakinaraz diezaieten.

Erregularizazioaren ondorioz, hiru kasu gerta daitezke:

Egokia ez izatea, urteko batez besteko kotizazio-oinarria errendimendu tartearen hileko gutxienekoaren eta gehienekoaren artean dagoelako.

Urteko batez besteko kotizazio-oinarria tartearen gutxienekoa baino txikiagoa izatea; kasu horretan, Gizarte Segurantzak erregularizazioaren ondoriozko zenbatekoa eskatuko du eta autonomoak ordaindu beharko du erregularizazioaren emaitza jakinarazi eta hurrengo hilabeteko azken egunera arte.

Urteko batez besteko kotizazio-oinarria tartearen gehienekoa baino handiagoa izatea. Kasu horretan, Gizarte Segurantzak ofizioz itzuliko du erregularizazioaren aldea.

Salbuespen gisa, 2022/12/31n oinarri handiago batengatik kotizatzen ari ziren autonomoek eutsi ahal izango diote. Baina, kasu horretan, uko egin beharko diote itzulketari erregularizazioaren emaitza jakinarazi eta hurrengo hilabeteko azken egunera arte.

Horregatik guztiagatik, oso garrantzitsua da Gizarte Segurantzan jakinarazpen bat dagoela dioen oharra SMS bidez edo posta elektronikoz iristen denean, ziurtagiri digitalarekin Gizarte Segurantzaren egoitza elektronikora sartzea, deskargatzeko eta erregularizazioaren emaitza jakiteko eta horren arabera jokatu ahal izateko.