UAGAk bilera bat izan zuen joan den astean Azucarerarekin eta bertan jakinarazi ziguten hurrengo kanpainatik aurrera Toroko fabrikara erremolatxaren garraioaren % 70 inguru nekazarien kontura izango dela. Aurten bertan, enpresak erremolatxa ehotzen utzi zuen Mirandan eta garraioak eragindako kostuak bere gain hartuko zituela esan zigun. Beste behin ere, aurrekoetan egin duen bezala, ez ditu betetzen nekazariekin dituen akordioak.

Erabaki berri honekin, eskainitako prezioekin batera, benetan British Sugar esaten ari dena oso argia da: ez duela gure erremolatxa nahi. Eskeinitako prezioei, garraioaren kostua kenduz eta sektoreak jasotzen dituen laguntzak gehituz, landatzeak 1.300 – 1400 euro/hektarea inguruko galera ekarriko luke. Nekazariak 1.300 € baino gehiago jarri beharko lituzke bere poltsikotik ekoizpen kostuetara heltzeko.

Lotsagarria da negozioa handitzeko laguntza publikoez baliatu den enpresa batek inolako eskrupulurik gabe laborariak abandonatu eta ekoizpena deslokalizatzeko duen erabakiarekin aurrera egitea. Horrek guztiak lehen sektorean eta landa garapenean dituen ondorio larriekin.

Hala ere, orain jasotzen hasiko den 2025-2026 kanpainarekin bukatutzat emango da mende bat baino gehiago iraun duen Azukareraren eta Arabako laborarien arteko harremana. Egun hauetan lehen uzta bilketak egiten ari dira eta produkzioan lortutako emaitzak errentagarritasun mailaren oso azpitik daude. Aurtengo ereite berantiarraren eta eguraldi txarraren ondorioz gertatzen da, abuztuan eguneko eta gaueko tenperatura altuek bultzatuta. Horri gehitu behar zaio neonikotinoideak kentzeak berekin ekarri duela haien eraginkortasuna konpentsatzen ez duten tratamendu ezberdinen areagotzea eta horrek ekoizpen kostuen garestitzearekin.

UAGA alternatibak bilatzeko lanean ari da, datorren urtean ez baita erremolatxarik ereingo industria horretarako. Sindikatuaren lehentasuna ustiategien errentagarritasuna mantentzea da, gure ureztaketei bizia ematea eta lehen sektoreko ehuna mantentzea, izan ere ezin da ulertu landa ingurua nekazaririk gabe.

Prentsa-ohar osoa hemen kontsulta dezakezu.