Gizarte Segurantza 2024. urteari dagozkion kotizazio-oinarrien erregularizazioari eta horren emaitza autonomoei jakinarazteari buruzko jakinarazpenak bidaltzen hasi da. Jakinarazpen hori Gizarte Segurantzaren Egoitza Elektronikoak bakarrik egingo du.

Horretarako, autonomo guztiei gogorarazten zaie Gizarte Segurantzaren Egoitza Elektronikoan jakinarazpen hori eskuratu ahal izateko beharrezkoa dela ziurtagiri digital bat izatea (Izenpe, gako iraunkorra, Diruaren eta Zerga-zigiluaren Fabrika Nazionalaren ziurtagiria), edo NAN elektroniko bat. Era berean, mugikorraren zenbakia eta helbide elektronikoa jakinarazi beharko dizkiote Gizarte Segurantzari, jakinarazpen bat dutela jakinaraz diezaieten.

Erregularizazioaren ondorioz, hiru kasu gerta daitezke:

1. Urteko batez besteko kotizazio-oinarria tartearen gehienekoa baino handiagoa izatea. Kasu horretan, Gizarte Segurantzak ofizioz itzuliko du erregularizazioaren ondoriozko aldea. Salbuespen gisa, 2022/12/31n oinarri handiago batengatik kotizatu zuten autonomoek eutsi ahal izango diote itzulketari, baina kasu horretan uko egin beharko diote erregularizazioaren emaitza jakinarazi eta hurrengo hilabeteko azken egunera arte. Autonomo horiei egiten zaizkien jakinarazpenak iristen hasi diren lehenak dira.
2. Ez dela bidezkoa, urteko batez besteko kotizazio-oinarria errendimendu-tartearen gutxieneko eta gehieneko hilekoen artean dagoelako.
3. Urteko batez besteko kotizazio-oinarria tartearen gutxienekoa baino txikiagoa izatea. Kasu horretan, Gizarte Segurantzak erregularizazioaren ondoriozko zenbatekoa erreklamatuko du, eta erregularizazioaren emaitza jakinarazi eta hurrengo hilabeteko azken egunera arte sartu beharko da, horretarako dagokion ordainketa-gutuna deskargatuz.

Horregatik guztiagatik, oso garrantzitsua da Gizarte Segurantzan jakinarazpen bat dagoela dioen oharra SMS bidez edo posta elektronikoz iristen denean, ziurtagiri digitalarekin Gizarte Segurantzaren egoitza elektronikora sartzea, 10 eguneko epean deskargatzeko eta erregularizazioaren emaitza jakiteko, horren arabera jarduteko.