Dermatosi nodular kutsakorra ez hedatzeko prebentzio-neurriak berriro indarrean jartzeko agindua onartu zuen atzo Eusko Jaurlaritzak. Gogorarazi nahi dugu neurriak abenduaren hasieran eten zirela, Katalunian kasu berririk izan gabe hilabete gehiago igaro ondoren. Orain, Frantzian foku berriak gerturatzen ari direnez, egokitzat jo da berriro ezartzea.

Agindua abenduaren 26an, ostiralean, argitaratuko da, eta egun horretatik aurrera jarriko da indarrean. Hona hemen neurri nagusiak:

• Feriak, lehiaketak eta abere-kontzentrazioak aldi baterako etetea, otsailaren 26ra arte; egun hori luzatu ahal izango da gaixotasunaren bilakaeraren arabera.
• Biosegurtasun-neurriak: abeltzaintzako ustiategietara bisitak mugatzea gomendatzen da, ustiategien artean langileen, makinen, ekipoen eta materialen erabilera partekatua saihestea, eta ibilgailuen eta garraio  elementuen desinfekzioa eta desintsektazioa indartzea gomendatzen da.
• Bektoreen aurkako borroka: Animaliak intsektu hematofagoetatik (eltxoak, tanbanoak, kaparrak, etab.) babestuta mantentzeko eskatzen da. Halaber, instalazioetan eta garraiobideetan intsektizidak aplikatzea gomendatzen da, intsektuen ugalketa murrizteko.
• Animalien mugimenduen kontrola: Debekatuta dago gaixotasuna aitortu den eremuetako animaliak sartzea. Gainera, berrogeialdiak egin beharko zaizkie jatorri horietatik datozen ustiategietan sartutako behiei.
• Osasun zaintza indartua: Abeltzainei behi aziendaren eguneroko ikuskapena eskatzen zaie, arreta berezia jarriz buruko, sabelaldeko, errapeetako, besapeetako, genitalen eremuko, kolaren oinarriko eta beheko aldeko eta izterretako larruazaleko lesioei. Edozein susmo izanez gero, kaltetutako animaliak isolatu egin behar dira, eta berehala jakinarazi albaitaritza zerbitzu ofizialei.