Aurten ere, Arabako landa-ingurunean lan egiten dugun erakundeok elkartu egin gara –ACOA, Cáritas Gasteizko Elizbarrutia, Arabako Landa-inguruneko Kristauak, Gure Soroa, Landa-inguruneko Emakumeen Sarea eta UAGA–, maiatzaren 15ean ospatzen den Lan-eremuaren Egunaren harira, gure herrien egoeren eta beharren inguruan hausnartzeko eta lan egiteko.

Maiatzaren 15ean ospatuko dugu gure eguna herri bakoitzak antolatzen dituen ekitaldiekin, guztiak gonbidatuz eguerdiko 12etan ohiko kanpai-jotzea egitera. Baina, kolektibo gisa, pertsona guztiei egin nahi diegu helburu komun batekin lan egiteko deialdia: sareak ehuntzea eta gure konexioak hobetzea, pertsona zein herri gisa dugun geure identitateari eutsiz, guztiontzako bizimodu hobe baterako beharrezko aldaketak lortu ahal ditzagun.
Egunotan sare sozialen bitartez zabalduko dugun bideo batean jaso dugu ideia hori. Konparazio batera, eta txikienera jota, gure burmuineko konexioen planteamendua eraman nahi dugu gure kolektibora.

Izan ere, konexio neuronal bakoitzak milaka konexio berri sortzen du, burmuinaren plastikotasuna sustatzen du eta gure osasuna prebenitu. Gure identitatea ezarrita datorkigu, baina eguneroko ikaskuntzarekin, denborarekin aldatzen doazen eta pertsona gisa moldatzen gaituzten sare neuronal berriak sortzen dira.

Halaber, gure herrietako bizimodua hobetu egiten da pertsonen eta inguruko herrien arteko harremanak hobetzen baditugu, malguak baldin bagara eta ideia berriak onartzeko irekita baldin bagaude. Horretarako, beharrezkoa da esfortzu pertsonala zein kolektiboa egitea.

Pertsonen arteko harremanak bultzatzearen aldeko apustua egiten dugun, komunitatea sortuz, bestearen beharrei erantzunez. Lehendik dugunari eutsiz (kultura, ohiturak, landa-inguruneko berezko lanak, etab.), ekintzailetza sustatzeko gai izan behar gara, gure herriek biziraun dezaten lagunduko duten lan berriak eta bizitzeko modu berriak sortzeko.

Uste dugu beharrezkoa dela era guztietako konexioak hobetzea, harreman pertsonalak lehenetsiz, baina ezinbestekoa da egiturazko harremanak –errepideak, zerbitzuak, etab.– zein digitalak lantzea ere. Beharrezkoa dugu sare horiek lurraldeko leku guztietara behar bezala hel daitezen, haiek sinplifikatuz, biztanle guztientzako irisgarriak izan daitezen. Halaber, beharrezkoa dugun adin handieneko pertsonei digitalizazio-prozesuan laguntzea, inor ez dadin gelditu gizarte honetatik kanpo.

Azken batean, ikaskuntzatik eta aktibo berriak txertatzetik gure identitateari eustea lortzen badugu, hobetu egingo gara pertsona, herri eta gizarte bezala.

Pertsonak batuz, herria eraikitzen dugu. Elkarrekin #birkonektatuz.