Ramiro Gonzálezek ekainaren 28an Arabako Ahaldun Nagusi kargua hartu ondoren, joan den ostiralean jakin zen foru-organigrama berria eta datozen 4 urteetan Lurraldean erantzukizun handiena izango duten diputatu berriak.

Lehen aldiz, Nekazaritzak ez du sail propiorik izango, bere eskumenak Iraunkortasun eta Ingurune Naturalarekin batzen baitira. UAGAren ustez, erabaki hori bereziki larria da, lehen sektoreak pisu espezifikoa baitu foru-egituraren barruan. Nekazaritza azken urteotan garrantzi handia hartu duten bi eremuren erdian geratzen da. Honela, gure jarduera bigarren maila batean eta lehentasun txikiagoan utzi daiteke. Adibidez, diputatu berriak nekazaritza lurren  babesa plaka fotovoltaikoen proiektuen aurrean nola defendatuko duen zalantzak ditugu.

Amaia Barredo Gómez da Iraunkortasuna, Nekazaritza eta Ingurune Naturaleko diputatu berria. Donostiakoa da eta Urkulluren Jaurlaritzan Ingurumen Jasangarritasuneko sailburuorde karguan egon da azken urteotan. Bere ibilbide profesionalaren zatirik handiena eremu publikoan eta ingurumenarekin lotutako erantzukizunetan eman du.