UAGAk bilera egin du aste honetan Aldundiarekin, eta Gipuzkoan mingain urdineko kasu bat detektatu ondoren jarraitu beharreko protokoloa azaldu du.

Ministerioaren legeriaren arabera, behin positiboa baieztatuta, 150 kilometroko erradioan jarri behar da txertoa ganaduan; beraz, 3 hilabetetik gorako animaliei txertoa jarri behar zaie Euskadin.

PCRak doan egiteko aukera dago azaroaren 30era arte. Abendutik aurrera, zerbitzu horrek kostu ekonomikoa izango du.

Txertoa jartzeko epea 2025eko martxoaren 15ean amaituko da, baina Aldundiko zerbitzu teknikoek lehenbailehen egitea gomendatzen dute, gaixotasuna lurraldean ez agertzeko eta ez garatzeko.

Aldundiaren arabera, aplikatzen ari den txertoak ez du bigarren mailako ondoriorik, eta 4 serotipoaren eta 8 serotipoaren aurkako eragin bibalentea du. Gainera, etorkizunean txertoa jaso duten animaliak zein diren jakiteko aztarnak ditu. Azaldu dutenez, beste Autonomia Erkidego batzuetan, Katalunian adibidez, urtebete daramate txerto hori erabiltzen, albo-ondoriorik gabe. Era berean, ziurtatu dute Gipuzkoako eta Bizkaiko esne-abeltzainek ez dutela ekoizpena murriztu txertoa jarri ondoren.

Mingain urdinaren gaixotasunari eta Estatuan duen sakabanaketari eta bilakaerari buruzko informazio eguneratua duzu Ministerioaren esteka honetan.